2Cor 7 | MHL | STEP | Aria emar unowik, i Mua Maneka opor unowa nain yia maakep koonowak. Naapeya nia maakiyem, i yiena kukusa yiam saliwami sira samo-samora iirarikua, eena kema-pa yiar ikomakeya mia-pa pina onimik nain. Naeya i Mua Maneka kekanowa wiar kema suuwami ekima opap sira makeniw onam-ikok dubil eliwa, tumin marew ikaiyen.

2 Corinthians 7

1 Aria emar unowik, i Mua Maneka opor unowa nain yia maakep koonowak. Naapeya nia maakiyem, i yiena kukusa yiam saliwami sira samo-samora iirarikua, eena kema-pa yiar ikomakeya mia-pa pina onimik nain. Naeya i Mua Maneka kekanowa wiar kema suuwami ekima opap sira makeniw onam-ikok dubil eliwa, tumin marew ikaiyen.

Pol ona kemelow maneka nain wame maek

2 Ne ni yia kookalow manekiw ikeka. I sira samora-ko me nia onamik, pina onowa-ko me nia suuwamik. Ne i mua-ko peeskimemi maa me wiar aawemik. 3 Yo me pina-pa nia wuekam naep maiyem, weetak. Yo nan maem, i manek akena nia kookalimik, ni eliwa yia wuiman. Naeya i mokok enum ikok epaskun ikowa pun eliw, ne i epaskun naap ikok umowa pun eliw. 4 Yo makena nia amisarem, ni baliwep ikaiman, nain naep kemeliyem. Makena, pina sira-sira efar imenariya, nain yo nia kema suuwap kema iikirap kekaniyem. Ne manek akena kemeliyem.

Pol ame Masedonia-pa ikemik nain maek

5 Ne i Masedonia ikiwep nan ikemik nain i-ko me uuraremik. Moram uuwow yoowa unowa feenap yiar imenarek. Mua Maneka opora wiar kapewimik nain oporiw wiamiya irakem-ikemik, ne yiena pun keker opowa yiar ikua. 6 I kema naap pinarem-ikemkun Taitus-ke ekapep yiar fuuneya kema tenemik. Nain Mua Maneka eena i kema pinarem-ikemkun yia saliwiya nain-ke naap yia onomak. 7 Ne me nain muutiw, Taitus-ke ekapemi yia maakek, ni o kemalemi sira eliwa-pa aaweman. Ne fain pun yia maakek, yo efa urufowa kema maneka wuam-ikaiman, ne ni iiriw sira samora onaman nain, muuta nain kema samorarep ikeman ne opora efar miimowa kookalem-ikaiman, naap maek. Yo nain niar miimap manek akena kemeliyem.

Wiena sira samora kema suuwap kema kirowa-ke eliwa

8 Makena, yo iiriw parosifa oko nia siisimomam nain-ke kema nia samorak, nain yo feenap me mainen, me sesekekam-na eliw-yon aa! Makena, yo iiriw parosifa nia siisimoman nain urufap kema samorareman, nain kema samorarowa me eeyareman. 9 Ne yo aakisa kemeliyem. Me yo kema nia samoram nain maiyem, weetak. Ni eena pina onaman nain niam furewap kema kirep era eliwa-pa ikeman, muut nain kemeliyem. I opora nia maakemkun Mua Maneka-ke ni kema nia kiripeya aakisa kema eliwa ikeman. Ne naapeya maiyem, i opora nia maakemik nain-ko me nia samorak, weetak. 10 Feenap, i pina onamkun Mua Maneka ona kema yieya i nain kema suuwap kema samor maneka ikaimik. Naap ikok i kema kiremkun ona yia aawiya. Naapeya naap kema samorarowa-ke eliwa. Ne wi mua sira samora onap kema samorarimik, nain Mua Maneka kema suuwap kema me kirimik, wi nain ikoka umep mesenalikuan.

11 Aa, eliw oram, ni niena sira niam urufaman. Ni kema samorarep ikaiwkin Mua Maneka-ke kema nia kiripeya ni sira samora onaman nain iiwawun piipuaman. Ne ni teeria mua eena sira samor akena onak nain maiman, “I mokokiw me ikekamik-na eliw-yon,” naap niam maiman. Ne sira samora muuta nain nieniw niam amukarem-ikaiman, “Moram i sira feenap onamik ya.” Naemi ni kema tootoneman, ne i yia urufowa kema wiisarem-ikaiman. Naemi sira eliwa ookowa kema iiwawun iikiriman. Ne mua eena i maemik nain nan kakenami sira ofakowaman. Neeke i sira niar amisarep nia maimik, ni sira samora ookowa miatiniman naimik.

12 Naapeya yo parosifa nia siisimoman nain me mua eena pina onak nain naep siisimem, ne pun me mua eena o pina onak nain naep siisimem, weetak. Fain naep, ni Mua Maneka mokoka-pa feenap niam maeka naep, “Aa, i Pol kookalep opora pun wiar ookam-ikaimik,” naap niam maeka naep. 13 Ne ni naap oniwkin i kema tenemik.

Ne i me maa nain muutiw kema tenemik, weetak. Fain pun, Taitus ni niar ikiwep sira eliwa niar urufap kema tenep manek akena nia kemelak. Naapeya i unowiya pun kemelamik. 14 Yo iiriw ni sira eliwa nain o nanaromami ni unuma niar siikam. Naeya o niar ikiwok-na yo nia maep opora maakem nain pepek naap urufap makena naek. I opor unowa nia maakemik nain makena nia maakemik. Neemi unuma nia siikami Taitus opora maakemik nain pun makena. 15 O niar ikiwok nain tetaremi opora wiar miimowa karaneman. Nain niar kema suuwap manek akena nia kookalek. 16 Naapeya manek akena kemeliyem, moram yo feenap maiyem, yo opora efar miimaman, ne ikoka sira eliwa naap manekiw onam-ikowen, yo muut nain kemeliyem.